اداکارہ جویریہ سعود کے پانی سے متعلق بیان پر سوشل میڈیا صارفین کی حیرت اور دلچسپ تبصرے جاری ہیں۔
حال ہی میں ایک ٹی وی شو کے دوران میزبان جویریہ سعود نے مہمان اداکارہ ایمن خان کو بتایا کہ جاپانی سائنسدان کی پانی پر کی گئی تحقیق کے مطابق 'ہر پانی کی اپنی تاثیر ہوتی ہے'۔
جویریہ سعود نے کہا کہ 'جاپانی سائنسدان نے بتایا تھا کہ پانی کے اندر جذبات ہوتے ہیں اور وہ سن سکتا ہے۔ اس سائنسدان نے دو پانی کی بوتلوں کو اپنے پاس رکھا، ایک بوتل پر اچھی باتیں کیں اور دوسری بوتل پر بری باتیں کیں۔ کچھ وقت گزرنے کے بعد سائنسدان نے ان بوتلوں کے پانی کا مشاہدہ کیا تو اچھی باتوں والا پانی صاف تھا جبکہ بری باتوں والا پانی گندا ہوچکا تھا'۔
اس تحقیق کی بنیاد پر جویریہ سعود نے دعویٰ کیا کہ 'جب ہم کھانا بناتے ہیں تو اس میں چونکہ تین حصے پانی اور ایک حصہ مواد ہوتا ہے، لہٰذا جب ہم دل سے بناکر کھانا گھر والوں کے سامنے پیش کرتے ہیں تو اس کی تاثیر بھی ایسی ہی ہوتی ہے'۔
جویریہ سعود کی وائرل ویڈیو پر صارفین کے تبصرے مختلف ہیں۔ کئی صارفین نے اداکارہ کے بیان کی تصدیق کی جبکہ کچھ نے اسے غلط سمجھ کر اس کا مذاق اڑایا۔