پاکستان کی ورسٹائل سینئر اداکارہ فضیلہ قاضی نے قیصر نظامانی سے اپنی پہلی ملاقات اور شادی کے سفر کی دلچسپ کہانی سنائی۔ نجی ٹی وی کے شو میں شرکت کے دوران فضیلہ قاضی سے سوال کیا گیا کہ قیصر نظامانی نے انہیں شادی کے لیے کیسے راضی کیا تھا اور ان کی پہلی ملاقات کہاں ہوئی؟
فضیلہ قاضی نے بتایا کہ ہم پاکستان ٹیلی ویژن کے کوریڈورز میں ملے۔ شروع میں قیصر سندھی ڈراموں میں کام کرتے تھے اور بعد میں اردو ڈراموں میں آئے۔ میری امی کو قیصر بہت پسند تھے اور وہ ان کے ڈرامے دیکھتی تھیں۔ انہوں نے مجھ سے کہا کہ ایک نیا ہیرو آیا ہے، مجھے ملواؤ۔
فضیلہ قاضی نے بتایا کہ ایک شو پر ملنے کے بعد قیصر مجھے پھول دیا کرتے تھے اور اکثر میرے گھر آجاتے تھے۔ ایک دن میں نے کہا کہ جو آپ میرے پیچھے پیچھے پھرتے ہیں، یہ مناسب نہیں ہے۔ میرے بابا نے بڑی مشکل سے ڈراموں میں کام کرنے کی اجازت دی تھی۔
پھر قیصر نے کہا کہ آپ مجھے اچھی لگتی ہیں۔ اس پر میں نے کہا کہ آپ رشتہ بھجوائیں تو ہم شادی کرلیں گے۔ فضیلہ قاضی نے بتایا کہ مجھے لگا تھا کہ قیصر انکار کردیں گے، لیکن ایسا نہیں ہوا۔ انہوں نے کہا ٹھیک ہے، لیکن ان کے والدین شادی پر رضامند نہیں تھے۔ قیصر نے کہا کہ پھر بھی میں شادی یہی کروں گا۔
فضیلہ قاضی نے مزید بتایا کہ قیصر کے گھر والوں نے کہا کہ ابھی تم کما رہے ہو، کیرئیر کی شروعات ہے، لیکن قیصر نے کہا کہ میں زبان دے چکا ہوں۔