پشاور کے حیات آباد انسٹی ٹیوٹ آف کڈنی ڈیزیز کے آپریشن تھیٹرکی ویڈیو وائرل ہوئی جس میں آپریشن تھیٹر میں مریض کی سرجری کے دوران لال بیگ چلتا نظر آ رہا ہے۔
وائرل ویڈیو میں دیکھا گیا کہ لال بیگ آپریشن کے آلات پر چل رہا ہے۔ ویڈیو میں دیکھا گیا کہ سرجری کرنے والا ڈاکٹرمعاون عملے سے لال بیگ ہٹانے کا کہہ رہے ہیں۔
ڈاکٹرز نے کہا کہ لال بیگ کو ہٹادو، ورنہ مریض کے سیپسز میں چلا جائے گا، یہ ہمارے آپریشن تھیٹر کے صفائی کی صورتحال ہے۔
پشاورانسٹیٹیوٹ آف کڈنی ڈیزیز کے ڈائریکٹر پروفیسر ڈاکٹر مظہر خان نے گفتگو میں بتایا کہ لال بیگ کی موجودگی کے بعد آپریشن تھیٹر کو 24 گھنٹے کے لئے بند کیا گیا۔
انھوں نے کہا کہ تمام آپریشن دوسرے آپریشن تھیٹر منتقل کردیے گئے ہیں، آپریشن تھیٹر میں جراثیم کش سپرے کے استعمال کو یقینی بنایا گیا ہے۔
ان کا کہنا تھا کہ آپریشن تھیٹر صفائی کو یقینی بنانے کے بعد ہی کھولیں گے، تین دن قبل ہی صفائی کا ٹھیکہ منسوخ کیا گیا، یہ ٹھیکہ جراثیم کش سپرے موثر نہ ہونے کے سبب منسوخ کیا گیا تھا۔