لاہور : مسلم لیگ ن کے قائد اور سابق وزیراعظم نوازشریف کی العزیزیہ اور ایون فیلڈ ریفرنس میں درخواست ضمانت 48 گھنٹے میں دائر کی جائے گی۔
تفصیلات کے مطابق مسلم لیگ ن کے قائد اور سابق وزیراعظم نوازشریف کی درخواست ضمانت کا ابتدائی مسودہ تیار کر لیا گیا۔
ذرائع نے بتایا کہ قانونی ٹیم کی جانب سے 48 گھنٹے میں درخواست دائر کی جائے گی، درخواستیں العزیزیہ اور ایون فیلڈ ریفرنس میں دائر کی جائے گی۔
سابق وزیراعظم نوازشریف ایون فیلڈاورالعزیزیہ ریفرنس میں سزایافتہ ہیں ، احتساب عدالت نےنواز شریف کو دس سال قید اور 80 لاکھ پاؤنڈ کی سزا سنائی تھی۔
العزیزیہ ریفرنس میں احتساب عدالت نے نواز شریف کو 7 سال قید کی سزا سنائی تھی۔
سابق وزیر اعظم نواز شریف کو 10سال کیلئے عوامی عہدے کیلئے نااہل قرار دیا گیا تھا اور اسلام آبادہائیکورٹ نے عدم پیروی پر نواز شریف کی اپیلیں خارج کردیں تھیں۔