اسلام آباد : انٹیلی جنس بیورو نے فیض آباد دھرنا کیس میں نظر ثانی درخواست واپس لینے کا فیصلہ کرلیا اور سپریم کورٹ میں متفرق درخواست دائر کردی۔
تفصیلات کے مطابق سپریم کورٹ میں فیض آباد دھرنا نظر ثانی پر سماعت سے قبل پیشرفت سامنے آئی ، انٹیلی جنس بیورو نے فیض آباد دھرنے پر نظر ثانی درخواست واپس لینے کا فیصلہ کرلیا۔
انٹیلی جنس بیورو کے ڈپٹی ڈائریکٹر اسداللہ خان نے متفرق درخواست دائر کردی ، جس میں مؤقف اختیار کیا گیا کہ فیض آباد دھرنا نظر ثانی 28 ستمبر کو سپریم کورٹ میں سماعت کیلئے مقرر ہے، انٹیلی جنس بیورو فیصلے کیخلاف نظر ثانی واپس لینا چاہتا ہے۔
آئی بی نظرثانی درخواست کا دفاع نہیں کرنا چاہتی، استدعا ہے کہ متفرق درخوست منظور کرکے نظر ثانی درخواست واپس لینے کی اجازت دی جائے۔
درخواست گزار شیخ رشید کے وکیل امان اللہ کنرانی نے مقدمہ ملتوی کرنے کی استدعا کرتے ہوئے کہا کہ ایڈووکیٹ امان اللہ کنرانی بلوچستان کے نگران وزیر قانون بن چکے ہیں اور امان اللہ کنرانی شیخ رشید کے وکیل کی حیثیت سے پیش نہیں ہو سکتے۔