لندن: کینسر اور امراض قلب دنیا بھر میں اموات کی بڑی وجوہات ہیں اور ایک طویل عرصے سے ان کی ادویات اور ویکسینز پر بھی کام کیا جارہا ہے۔
برطانوی اخبار کے مطابق کینسر اور دل کی بیماریوں سے بچانے والی ویکسین چند برسوں میں تیار کیے جانے کا امکان ہے۔
دوائيں بنانے والی کمپنی نے امید ظاہر کی ہے کہ 2030 تک کینسر اور دل کی بیماریوں کے خلاف قوت مدافعت پیدا کرنے والی ویکسین مارکیٹ میں آجائے گی، ان ویکسینز کی تیاری پر 15 سال سے کام جاری ہے۔
حال ہی میں معروف ادویہ ساز کمپنی فائزر نے کینسر کے علاج میں نئی اختراع کے لیے بائیوٹیک کمپنی سیگن کے ساتھ 43 ملین ڈالرز کا معاہدہ کیا ہے۔
ترجمان فائزر کمپنی کے مطابق وہ بائیو ٹیک کمپنی کو ہر حصص کے لیے 229 ڈالر ادا کرے گا، سیگن کے مارکیٹ میں 4 علاج ہیں، اس میں ادویات کی ایک پائپ لائن بھی تیار کی جا رہی ہے جس میں پھیپھڑوں کے کینسر اور جدید چھاتی کے کینسر کے ممکنہ علاج شامل ہیں۔