ٹوکیو: ایک تحقیق سے یہ بات سامنے آئی ہے کہ ماؤتھ واشز اپنے اندر کورونا وائرس کو غیر مؤثر بنانے کی صلاحیت رکھتے ہیں۔
جاپان کی ہوکائیڈو یونیورسٹی میں محققین کی ایک ٹیم نے تحقیق میں بتایا کہ سِیٹل پائرِنیڈیم کلورائیڈ (سی پی سی) کی کم مقدار اپنے اندر کورونا وائرس کو غیر فعال کرنے کی صلاحیت رکھتا ہے۔
تحقیق کے مطابق مارکیٹ میں دستیاب ماؤتھ واشز میں متعدد ایسے اینٹی بائیوٹک اور اینٹی وائرل کیمیاء موجود ہوتے ہیں جو منہ کے اندر مائیکرو حیاتیات کے خلاف کام کرتے ہیں، سیٹل پائرِنیڈیم کلورائیڈ منہ میں کوویڈ کے وائرل لوڈ کو وائرس کے اطراف موجود جِھلی کو متاثر کر کے کم کرتا ہے۔
اس کے علاوہ ماؤتھ واشر میں ایسے دیگر کیمیکلز بھی ہوتے ہیں جن میں کورونا کو غیر فعال کرنے کی خصوصیت ہوتی ہے لیکن سیٹل پائرِنیڈیم کلورائیڈ میں خوشبو یا کسی ذائقے کا نہ ہونا اس کو اضافی خصوصیت بخشتا ہے۔
محققین نے جاپانی ماؤتھ واشز میں سی پی سی کی موجودگی کے اثرات کی تحقیق کی، انہوں نے سی پی سی کے سیل کلچر(کنٹرول ماحول میں خلیوں کے نمو کا عمل) پر اثرات کا ٹیسٹ کیا جو کووڈ وائرس کو خلیوں میں داخل ہونے کے لیے لازمی پروٹین کی رفتار تیز کرتا ہے۔
تحقیق کے نتیجے میں دیکھا گیا کہ سی پی سی نے استعمال کے 10 منٹ کے اندر کوویڈ وائرس کے خلیوں میں داخل ہونے کی صلاحیت کو غیر مؤثر کردیا، اس ٹحقیق میں ایک اور حیران کن چیز سامنے آئی کہ مارکیٹ میں دستیاب ماؤتھ واشز میں سی پی سی کی کارکردگی خالص سی پی سی سے بہتر تھی۔
سائنٹیفِک رپورٹس میں شائع ہونے والی تحقیق میں یہ بھی معلوم ہوا کہ یہ کووڈ کے کسی بھی ویریئنٹ کے لیے یکساں مؤثر ہوتا ہے۔