کراچی: پاکستان کے بڑے شہروں میں فضائی آلودگی کی صورت حال انتہائی سنگین ہو چکی ہے، آلودگی بڑھنے سے بچوں اور بڑوں میں سانس اور امراض سینہ جنم لینے لگے ہیں۔
تفصیلات کے مطابق ملک کے بڑے شہروں میں آلودگی میں اضافے کی وجہ سے بچوں اور بڑوں میں سانس، امراض سینہ اور دیگر مسائل جنم لے رہے ہیں۔
قومی ادارہ برائے صحت اطفال کے ڈاکٹر کمل دیو کا کہنا ہے کہ تمام الرجک مریض فضائی آلودگی کی صورت حال سے شدید متاثر ہو رہے ہیں، اس لیے شہری ماسک کا استعمال لازمی کریں۔
انھوں نے مشورہ دیا کہ سانس کے سنگین نوعیت کے مسائل اور امراض سینہ خطرناک ہونے کی صورت میں فوری طور پر معالج سے رجوع کریں۔
قومی ادارہ برائے صحت اطفال کے ڈاکٹر کمل دیو
واضح رہے کہ فضائی آلودگی کے اعتبار سے کراچی اور لاہور سرفہرست ہیں، ڈاکٹروں کے مطابق فضائی آلودگی سانس لینے کے عمل میں رکاوٹ بن رہی ہے۔
کراچی شہر سمیت سندھ بھر، اور سیلاب سے متاثرہ علاقوں میں سڑکیں تباہ حال ہیں، اندرون سندھ کے کئی اضلاع میں بھی نکاسی آب کا مسئلہ حل نہ ہو سکا۔
شہر قائد میں بھی جگہ جگہ سڑکیں ٹوٹی ہوئی ہیں، جن سے اڑنے والی گرد فضائی آلودگی کا سبب بن رہی ہے۔