اسپوٹیفائی کا متعدد پوڈ کاسٹس کے حوالے سے اہم فیصلہ

میوزک اسٹریمنگ سروس اسپوٹیفائی اگلے ماہ سے اپنی 10 پوڈ کاسٹ منسوخ کر رہا ہے، گزشتہ چند برسوں میں اسپوٹیفائی کمپنی نے پوڈ کاسٹ سروسز میں اہم سرمایہ کاری کی ہے۔

اسپوٹیفائی اگلے مہینے سے ان ہاؤس اسٹوڈیوز میں پرکاسٹ اور گیملٹ (امریکی پوڈکاسٹ نیٹ ورکس) کے تیار کردہ 10 اصل پوڈ کاسٹ منسوخ کر رہا ہے۔

ہالی ووڈ کے ایک رپورٹر نے بتایا کہ جو شو اختتام پذیر ہوں گے ان میں گیملٹ سے ہاؤ ٹو سیو اے پلینٹ، کرائم شو اور ایوری لٹل تھنگ شامل ہیں۔

پرکاسٹ نیٹ ورک کے اختتام پذیر ہونے والے شوز میں میڈیکل مرڈرز، فیمیل کرمنلز، کرائمز آف پیشن، ڈکٹیٹر، میتھولوجی، ہانٹڈ پلیسز اور اربن لیجنڈز شامل ہوں گے۔

پرکاسٹ نیٹ ورک کی جانب سے جاری پوڈ کاسٹ ہوروسکوپ ٹوڈے بھی ختم کر دیا گیا ہے تاہم آئندہ برس کی دوسری سہ ماہی میں اس کی نئی اقساط جاری کی جائیں گی۔

رپورٹ میں بتایا گیا ہے کہ ان سروسز کے خاتمے سے پوڈ کاسٹ کے لیے کام کرنے والا 5 فیصد سےبھی کم عملہ متاثر ہوگا، باقی اسٹاف کو کچھ دوسرے پروجیکٹس کے لیے مزید کام کی ذمہ داریاں دی گئی ہیں۔

واضح رہے کہ اسپوٹیفائی میوزک سٹریمنگ سروسز کی جانب سے 500 سے زیادہ خصوصی شوز تیار کیے جا رہے ہیں۔

گزشتہ چند برسوں میں اسپوٹیفائی کمپنی نے پوڈ کاسٹ سروسز میں اہم سرمایہ کاری کی ہے، بتایا جاتا ہے کہ کمپنی نے 2019 میں پرکاسٹ اور گیملٹ کے ساتھ مل کر پوڈ کاسٹنگ میں ایک بلین ڈالر کی سرمایہ کاری سے کئی دیگر پوڈ کاسٹ سروسز کا آغاز کیا۔