تناﺅ اور مایوسی ایسی کیفیات ہے جس سے ہر ایک کا سامنا ہوتا ہے مگر یہ آپ کو قبل از بوڑھا بھی بناسکتی ہیں۔
یہ انتباہ امریکا میں ہونے والی ایک طبی تحقیق میں سامنے آیا۔کیلیفورنیا یونیورسٹی کی تحقیق کے مطابق کسی صدمے کے بعد کا تناﺅ بڑھاپے کی جانب سفر کو تیز کردیتا ہے۔
صدمے یا چوٹ کے نتیجے میں یہ عارضہ جسے پی ایس ٹی ڈی بھی کہا جاتا ہے، لاحق ہوسکتا ہے جو انسان کی زندگی میں سے کئی برس کم کردیتا ہے۔تحقیق میں بتایا گیا ہے کہ صدمے کے بعد کا تناﺅ کروموسومز میں موجود ٹیلومیئرز کو نقصان پہنچاتا ہے جس کے نتیجے میں بڑھاپا قبل از وقت طاری ہونے لگتا ہے۔
تحقیق میں مزید بتایا گیا ہے کہ ایسے افراد کو بڑھاپے سے منسلک دیگر بیماریاں جیسے امراض قلب، ٹائپ ٹو ذیابیطس اور ڈیمنشیا وغیرہ کا بھی سامنا ہوسکتا ہے اور جلد موت کا خطرہ بھی ہوتا ہے۔
محققین کا کہنا ہے کہ یہ عارضہ مختلف واقعات جیسے سنگین ٹریفک حادثہ، جنسی زیادتی، طویل عرصے تک مظالم کا سامنا، فوجی جنگ یا قدرتی آفات وغیرہ کے نتیجے میں لاحق ہوتا ہے۔