غیر ملکی اور اسمگل شدہ ادویات کی فروخت کا انکشاف؛ ڈریپ نے دل، نیند اور مرگی کی غیر رجسٹرڈ دواؤں پر ریپڈ الرٹ جاری کر دیا

کراچی (نیوز ڈیسک) — ڈرگ ریگولیٹری اتھارٹی آف پاکستان (ڈریپ) کی جانب سے جاری کردہ ایک اہم الرٹ میں انکشاف کیا گیا ہے کہ کراچی کے مارکیٹوں میں عارضہ قلب، نیند اور مرگی کی غیر ملکی اور اسمگل شدہ ادویات کی غیر قانونی سپلائی کھلے عام جاری ہے۔ سینٹرل ڈرگ لیبارٹری (سی ڈی ایل) کراچی نے برطانوی اور اطالوی ساختہ ان غیر ملکی ادویات کے 3 سیمپلز کو غیر قانونی اور غیر رجسٹرڈ قرار دے دیا ہے، جس کے بعد متعلقہ اداروں کو سخت اقدامات کی ہدایت کی گئی ہے۔

ڈریپ کے جاری کردہ ریپڈ الرٹ کے مطابق ضبط کی جانے والی غیر قانونی ادویات کی تفصیلات درج ذیل ہیں:

• فلیکینائیڈ ایسیٹیٹ ٹیبلٹ (Flecainide Acetate): برطانوی ساختہ یہ دوا دل کی بے ترتیب دھڑکن کے علاج کے لیے استعمال ہوتی ہے، جس کے بیچ نمبر 'FDAG 020' کو غیر رجسٹرڈ قرار دیا گیا ہے۔

• موڈا فینل 200 ایم جی ٹیبلٹ (Modafinil): عارضہ نیند کے لیے استعمال ہونے والی یہ برطانوی ساختہ دوا بھی اسمگل شدہ ہے، جس کا بیچ نمبر 'MDSB25008A' غیر قانونی ہے۔

• مائیسولائن 250 ایم جی ٹیبلٹ (Mysoline): مرگی کے علاج میں استعمال ہونے والی اطالوی ساختہ اس دوا کا بیچ نمبر '4626' غیر رجسٹرڈ پایا گیا ہے۔

ڈرگ ریگولیٹری اتھارٹی کا کہنا ہے کہ ان غیر قانونی اور اسمگل شدہ ادویات کا معیار اور افادیت مکمل طور پر غیر واضح ہے جو انسانی صحت کے لیے انتہائی خطرناک اور غیر محفوظ ثابت ہو سکتی ہیں۔ ڈریپ نے ملک بھر بالخصوص کراچی میں ان ادویات کی سپلائی کرنے والوں کی فوری نشاندہی کرنے اور ان کے تمام مشکوک بیچز ضبط کرنے کی سخت ہدایات جاری کی ہیں۔ اس کے علاوہ تمام فارمیسز اور کیمسٹس کو ہدایت کی گئی ہے کہ وہ فوری طور پر ان غیر قانونی ادویات کی فروخت ترک کر کے ان کا موجودہ اسٹاک واپس کریں۔