ورلڈ کپ کے آخری گروپ میچ میں بھارتی کپتان روہیت شرما نے ریکارڈ 9 بولرز سے گیند کروانے کی وجہ بتادی۔
اس میچ میں بھارت نے اپنے سے نسبتاً کمزور حریف نیدرلینڈز کو جیت کےلیے 411 رنز کا ہدف دیا، جس کے تعاقب میں ڈچ ٹیم 250 پر آل آؤٹ ہوئی۔
بھارت اس میچ سے قبل ہی سیمی فائنل کےلیے کوالیفائی کرچکا تھا تاہم نیدرلینڈز کے ابتدائی بلے باز آؤٹ ہونے کے بعد اس نے مذکورہ میچ پر بھی گرفت مضبوط کرلی تھی۔
ایسے میں بھارتی کپتان روہیت شرما نے 9 بولرز سے گیند کروائی جس میں وہ خود بھی شامل تھے۔
نیدرلینڈز کی بیٹنگ کے دوران روہیت شرما، محمد سراج، محمد شامی، جسپریت بمرا، کلدیپ یادیو، رویندرا جڈیجا، سوریا کمار یادیو، ویرات کوہلی اور شبمن گل نے گیند بازی کی۔
واضح رہے کہ یہ ون ڈے کرکٹ میں کسی بھی ٹیم کی جانب سے ایک اننگز میں سب سے زیادہ بولرز کا استعمال ہے۔
اپنے اسے حربے سے متعلق روہیت شرما کا کہنا تھا کہ ’جب آپ کے پاس پانچ بولرز ہوں تو آپ پھر ٹیم میں یہ چانسز بھی پیدا کرنا چاہتے ہیں۔‘
انہوں نے یہ بھی کہا کہ ’آج ہمارے پاس 9 آپشنز تھے، یہ اہم ہے کیونکہ یہ وہ میچ تھا جہاں ہم اس طرح کی چیزیں کرنے کی کوشش کرسکتے تھے۔‘