آج رات ایک تہذیب ختم ہو سکتی ہے: ٹرمپ کی ایران کو نئی دھمکی

امریکی صدر Donald Trump نے ایک بار پھر ایران کے خلاف سخت بیان دیتے ہوئے عالمی سطح پر تشویش پیدا کر دی ہے۔ اپنے سوشل میڈیا پلیٹ فارم ٹروتھ سوشل پر جاری پیغام میں انہوں نے خبردار کیا کہ “آج رات ایک پوری تہذیب ختم ہو سکتی ہے”، اور دعویٰ کیا کہ خونریزی، بدعنوانی اور اموات پر مبنی 47 سالہ تاریخ اپنے اختتام کے قریب ہے۔

صدر ٹرمپ نے کہا کہ وہ اس صورتحال کے خواہاں نہیں، لیکن امکان ہے کہ حالات اسی سمت بڑھ رہے ہیں۔ انہوں نے یہ بھی دعویٰ کیا کہ ایران میں “رجیم تبدیل” ہو چکا ہے اور اب وہاں زیادہ “ذہین اور کم انتہا پسند” سوچ رکھنے والے افراد غالب آ سکتے ہیں، جس سے کسی بڑی تبدیلی کا امکان پیدا ہو سکتا ہے۔

یہ بیان ایسے وقت میں سامنے آیا ہے جب ایران کے حوالے سے امریکی ڈیڈ لائن اپنے اختتام کو پہنچ رہی ہے، جس نے خطے میں کشیدگی کو مزید بڑھا دیا ہے۔ اس سے قبل بھی ٹرمپ متعدد بار ایران کو سخت وارننگ دے چکے ہیں، جن میں توانائی کے انفراسٹرکچر کو نشانہ بنانے اور آبی گزرگاہوں کے حوالے سے دھمکیاں شامل تھیں، تاہم مختلف مواقع پر ان اقدامات کو مؤخر بھی کیا جاتا رہا۔

تجزیہ کاروں کے مطابق اس قسم کے بیانات خطے میں غیر یقینی صورتحال کو بڑھا سکتے ہیں، جبکہ عالمی برادری ایران اور امریکہ کے درمیان کشیدگی میں کمی کے لیے سفارتی کوششوں پر زور دے رہی ہے۔