خلیجی ممالک کو اپنی سرزمین، وسائل اور پالیسیوں پر مکمل اختیار حاصل ہے: اقوام متحدہ کی جانب سے سفارتکاری کے ذریعے تنازعات حل کرنے کا پیغام جاری

اقوام متحدہ نے ایران سے متعلق بڑھتی ہوئی علاقائی کشیدگی کے پیش نظر خلیجی ممالک کی خودمختاری اور سلامتی کی حمایت کا اعلان کیا ہے، جسے ایک اہم سفارتی پیغام قرار دیا جا رہا ہے۔

میڈیا رپورٹس کے مطابق اقوام متحدہ کے اس اعلان میں واضح کیا گیا ہے کہ خلیجی ممالک کو اپنی سرزمین، وسائل اور پالیسیوں پر مکمل اختیار حاصل ہے، اور کسی بھی بیرونی مداخلت یا دباؤ کو عالمی قوانین کے خلاف تصور کیا جائے گا۔

اعلامیے میں اس بات پر بھی زور دیا گیا کہ خطے میں جاری تنازعات کو طاقت کے استعمال کے بجائے سفارتکاری اور مذاکرات کے ذریعے حل کیا جانا چاہیے۔

جن خلیجی ممالک کی خودمختاری پر زور دیا گیا ہے ان میں سعودی عرب، متحدہ عرب امارات، قطر، کویت، عمان اور بحرین شامل ہیں۔

مشرقِ وسطیٰ میں بڑھتی کشیدگی، خصوصاً ایران، امریکا اور اسرائیل کے درمیان تناؤ کے باعث عالمی توانائی کی سپلائی بھی دباؤ کا شکار ہے، جس میں آبنائے ہرمز جیسے اہم بحری راستے کی سیکیورٹی خاص اہمیت اختیار کر گئی ہے۔

اقوام متحدہ کے اس اعلان سے واضح ہوتا ہے کہ عالمی برادری خلیجی ممالک کے استحکام کو انتہائی اہم سمجھتی ہے اور خطے میں کسی بڑے تصادم سے بچنے کے لیے سفارتی حل کو ترجیح دینے پر زور دے رہی ہے۔