.jpg)
ایران کے نومنتخب سپریم لیڈر آیت اللہ مجتبیٰ خامنہ ای کا عہدہ سنبھالنے کے بعد پہلا پیغام سامنے آگیا ہے جس میں انہوں نے شہداء کے خون کا بدلہ لینے کے عزم کا اظہار کیا ہے۔
اپنے آڈیو پیغام میں آیت اللہ مجتبیٰ خامنہ ای نے کہا کہ ان کا نیا عہدہ کئی ذمہ داریوں کا تقاضا کرتا ہے اور وہ قوم کی توقعات پر پورا اترنے کی کوشش کریں گے۔ انہوں نے کہا کہ ایرانی عوام نے دنیا کو دکھا دیا ہے کہ وہ ایک عظیم قوم ہیں اور عوام کی حمایت کے بغیر ان کی کوئی حیثیت نہیں۔
انہوں نے کہا کہ دشمن ایرانی عوام کو نشانہ بنا رہے ہیں اور قوم کو متحد ہو کر اس کا مقابلہ کرنا ہوگا۔ ان کا کہنا تھا کہ ایران اپنے شہداء کے خون کے بدلے کے حق سے دستبردار نہیں ہوگا اور قومی اتحاد کے ذریعے دشمن کو شکست دی جائے گی۔
ایرانی سپریم لیڈر نے کہا کہ مشرق وسطیٰ میں موجود امریکی فوجی اڈوں کو بند کیا جانا چاہیے، اگر ایسا نہ ہوا تو حملے جاری رہیں گے۔ ان کا کہنا تھا کہ ایران پڑوسی ممالک کے ساتھ دوستانہ تعلقات کا خواہاں ہے تاہم فوجی اڈوں کو نشانہ بنانے کا سلسلہ جاری رہے گا۔
انہوں نے مزید کہا کہ ایرانی عوام کے اتحاد کے ساتھ دشمن کو شکست دی جائے گی اور شہداء، خصوصاً مناب اسکول کے شہداء کا بدلہ ضرور لیا جائے گا۔
آیت اللہ مجتبیٰ خامنہ ای نے کہا کہ آبنائے ہرمز کو دشمن پر دباؤ ڈالنے کے لیے بند رکھا جانا چاہیے اور ایران اپنے تمام شہداء کے خون کا حساب ضرور لے گا۔