بل گیٹس نے ایپسٹین فائلز میں نام آنے پر معافی مانگ لی

مائیکرو سافٹ کے بانی اور دنیا کے امیر ترین افراد میں سے ایک بل گیٹس نے ایپسٹین فائلز میں اپنا نام آنے کے بعد بل گیٹس فاؤنڈیشن کے اسٹاف سے معافی طلب کی ہے۔

بل گیٹس نے کہا کہ ان کی جانب سے کچھ غلطیاں ہوئی ہیں جن سے فاؤنڈیشن کو نقصان پہنچا، تاہم انہوں نے واضح کیا کہ ایپسٹین کے جرائم میں ان کا کوئی حصہ نہیں اور ان کا تعلق مخیر افراد سے تعلقات بنانے تک محدود تھا۔ انہوں نے کہا کہ انہوں نے نہ کوئی غیر قانونی کام کیا اور نہ کسی غیر قانونی کام کو دیکھا۔

واضح رہے کہ امریکی محکمہ انصاف نے جنسی مجرم جیفری ایپسٹین کے متعلق 30 لاکھ صفحات، ایک لاکھ 80 ہزار تصاویر اور 2 ہزار ویڈیوز منظر عام پر لائی ہیں، جن میں متعدد معروف شخصیات کے نام شامل ہیں۔