قطر کے دارالحکومت دوحہ میں واقع العدید ایئربیس سے امریکی فوج کے کچھ اہلکاروں کو عارضی طور پر نکلنے کی ہدایت جاری کر دی گئی ہے۔
سفارتی ذرائع نے خبر ایجنسی سے گفتگو کرتے ہوئے تصدیق کی ہے کہ امریکی فوجی اڈے پر تعینات بعض اہلکاروں کو منتقل ہونے کا کہا گیا ہے، تاہم اس اقدام کی وجوہات سے متعلق باضابطہ تفصیلات سامنے نہیں آ سکیں۔
غیر ملکی میڈیا کے مطابق دوحہ میں امریکی سفارت خانے نے تاحال اس معاملے پر کوئی سرکاری بیان جاری نہیں کیا، جس کے باعث صورتحال پر قیاس آرائیاں جنم لے رہی ہیں۔
واضح رہے کہ العدید ایئربیس مشرقِ وسطیٰ میں امریکا کا سب سے بڑا فوجی اڈہ ہے، جہاں 10 ہزار سے زائد امریکی فوجی اہلکار تعینات ہیں اور یہ اڈہ خطے میں امریکی فوجی آپریشنز کا مرکزی مرکز سمجھا جاتا ہے۔
ذرائع کے مطابق جون میں ایران پر امریکی فضائی حملوں سے قبل بھی مشرقِ وسطیٰ میں موجود بعض امریکی فوجی اڈوں سے اہلکاروں کو ہٹا لیا گیا تھا، جس کے باعث موجودہ پیش رفت کو خطے کی سیکیورٹی صورتحال سے جوڑا جا رہا ہے۔
علاقائی کشیدگی کے تناظر میں امریکی فوجی نقل و حرکت پر عالمی مبصرین کی گہری نظر ہے، جبکہ قطر اور امریکا کے درمیان دفاعی تعاون بدستور قائم ہے۔