پاکستان سپر لیگ 10 کے بقیہ میچز کا آغاز کل سے راولپنڈی میں ہو رہا ہے، جہاں کراچی کنگز اور پشاور زلمی کی ٹیمیں مدِ مقابل ہوں گی۔ میچ راولپنڈی کرکٹ اسٹیڈیم میں شام ساڑھے سات بجے شروع ہوگا۔
دونوں ٹیمیں پلے آف تک رسائی کے لیے بھرپور تیاریوں میں مصروف ہیں، جبکہ غیر ملکی کھلاڑی بھی آج اپنی ٹیموں کو جوائن کریں گے۔ کراچی کنگز دس پوائنٹس کے ساتھ پوائنٹس ٹیبل پر دوسرے نمبر پر ہے، جبکہ پشاور زلمی آٹھ پوائنٹس کے ساتھ پانچویں نمبر پر موجود ہے۔ کراچی کی فتح کی صورت میں وہ پلے آف میں اپنی جگہ یقینی بنا لے گی۔
راولپنڈی میں کل ملا کر چار میچز ہوں گے، جن میں 18 مئی کو ڈبل ہیڈر بھی شامل ہے۔ اس دن دوپہر کو ملتان سلطانز کوئٹہ گلیڈی ایٹرز سے ٹکرائے گی، جبکہ شام کو پشاور زلمی کا مقابلہ لاہور قلندرز سے ہوگا۔
ایونٹ کا آخری گروپ میچ 19 مئی کو اسلام آباد یونائیٹڈ اور کراچی کنگز کے درمیان کھیلا جائے گا۔ اس کے بعد پلے آف مرحلہ لاہور منتقل ہو جائے گا، جہاں پہلا کوالیفائر 21 مئی کو، پہلا ایلیمینیٹر 22 مئی اور دوسرا ایلیمینیٹر 23 مئی کو قذافی اسٹیڈیم میں ہوگا۔
پاکستان سپر لیگ 10 کا فائنل 25 مئی کو لاہور میں کھیلا جائے گا۔ پی سی بی کے مطابق دن کا میچ 3 بجے اور رات کا میچ 7:30 بجے شروع ہوگا، جبکہ ٹکٹوں سے متعلق تفصیلات جلد جاری کی جائیں گی۔
8