کراچی کنگز نے آسٹریلیا کے سابق فاسٹ بولر شان ٹیٹ کو اپنی ٹیم کا فاسٹ بولنگ کوچ بنا دیا ہے۔ ٹیم کے مالک سلمان اقبال کا کہنا ہے کہ شان ٹیٹ کا جارحانہ بولنگ کا فلسفہ کراچی کنگز کی حکمت عملی کے ساتھ بالکل میل کھاتا ہے، اور ان کی کوچنگ سے ہماری بالنگ لائن اپ مزید مضبوط ہو جائے گی۔ شان ٹیٹ اس سے پہلے افغانستان اور پاکستان کی قومی ٹیموں کے بالنگ کوچ بھی رہ چکے ہیں۔
پاکستان سپر لیگ کا انعقاد 11 اپریل سے 18 مئی تک لاہور، کراچی، راولپنڈی، اور ملتان میں ہوگا۔ انگلینڈ کے سابق کپتان سر الیسٹر کک پہلی بار پی ایس ایل کے کمنٹری پینل کا حصہ بنیں گے۔ ان کے ساتھ مارک نکولس، ڈومینک کارک، جے پی ڈومینی، مائیک ہیز مین، مارٹن گپٹل، اور اطہر علی خان بھی کمنٹری کریں گے۔
دو بار ویمنز ورلڈ کپ جیتنے والی آسٹریلوی کرکٹر لیزا اسٹالکر بھی پہلی بار پی ایس ایل میں کمنٹری کریں گی۔ پاکستان کے چار سابق کپتان، رمیز راجہ، وسیم اکرم، وقار یونس، اور عامر سہیل، کے علاوہ بازید خان، عروج ممتاز، اور کرکٹ تجزیہ کار سکندر بخت بھی کمنٹری پینل کا حصہ ہیں۔ یہ وسیم اکرم کا پی ایس ایل کمنٹری میں پہلا تجربہ ہوگا۔