بنگلا دیشی عدالت نے عوامی لیگ کے سابق رکن اسمبلی اور کرکٹ اسٹار شکیب الحسن کے اثاثے ضبط کرنے کا حکم جاری کر دیا ہے۔
ڈھاکا کے ایڈیشنل چیف میٹروپولیٹن مجسٹریٹ ضیاء الدین رحمان نے پیر کو چیک باؤنس کیس میں شکیب الحسن کی جائیداد ضبط کرنے کی ہدایت دی۔
شکیب الحسن نے 2016 میں ستکھیرا میں کیکڑے کا فارم قائم کیا تھا، جو 2021 سے غیر فعال ہے۔ یہ چیکس بینک قرض کی ادائیگی کے لیے دیے گئے تھے، مگر ناکافی فنڈز کے باعث باؤنس ہوگئے۔
اکتوبر 2024 میں بینک نے شکیب کو قانونی نوٹس جاری کیا تھا، اور 24 دسمبر کو ان کے خلاف مقدمہ درج کر لیا گیا۔ جنوری میں عدالت نے شکیب الحسن کے وارنٹ گرفتاری جاری کیے تھے۔
شکیب الحسن اس وقت ملک سے باہر ہیں کیونکہ انہیں سیاسی بدامنی اور عوامی لیگ سے تعلق کے باعث جان سے مارنے کی دھمکیاں مل رہی ہیں۔ علاوہ ازیں، وہ حکومت مخالف مظاہروں کے دوران نوجوان کے قتل کے مقدمے میں بھی نامزد ہو چکے ہیں۔