ذرائع کا کہنا ہے کہ بین الاقوامی مالیاتی فنڈ (آئی ایم ایف) نے اسپیشل انویسٹمنٹ فیسلٹی کونسل (ایس آئی ایف سی) کی جانب سے پیش کردہ ٹیکس استثنا کی درخواست کو رد کردیا۔ آئی ایم ایف کے وفد کو ایس آئی ایف سی کے مختلف پہلوؤں پر بریفنگ دی گئی، جہاں سرمایہ کاری، گورننس اور اسٹرکچر پر تبادلہ خیال ہوا۔
پاکستانی حکام نے اس دوران چاغی سے گوادر تک ریلوے ٹریک کے منصوبے پر ٹیکس استثنا کی درخواست کی۔ ذرائع کے مطابق ریکوڈک سے نکالی جانے والی معدنیات کی گوادر تک ٹرانسپورٹ کے لیے نئی ریلوے لائن کی ضرورت ہے اور منصوبے کے تحت نئی لائن تعمیر کی جائے گی۔
چاغی-گوادر ریل منصوبے پر وزارتِ خزانہ، وزارتِ ریلوے اور ایس آئی ایف سی نے فزیبیلٹی اسٹڈی مکمل کی ہے۔ بریفنگ میں یہ بھی بتایا گیا کہ سرمایہ کار ممالک اس منصوبے میں سرمایہ کاری کے لیے ریاستی گارنٹی چاہتے ہیں، لیکن قرض پروگرام میں رہتے ہوئے حکومت پاکستان ہر سرمایہ کاری پر ریاستی گارنٹی نہیں دے سکتی۔