اسلام آباد: پاکستان نے عالمی مالیاتی ادارے (آئی ایم ایف) سے بجلی کی قیمت میں کمی پر معاہدہ کرلیا ہے۔ پاکستان اور آئی ایم ایف کے درمیان ایک ارب ڈالر قسط کے لیے مذاکرات جاری ہیں۔ توانائی شعبے کے حکام نے آئی ایم ایف وفد سے ملاقاتیں کیں۔
ذرائع کے مطابق، پاکستانی حکام نے آئی ایم ایف کو بجلی کی قیمت 2 روپے فی یونٹ کم کرنے پر راضی کیا ہے۔ اس کے علاوہ، بجلی کے بنیادی ٹیرف میں ڈیڑھ سے 2 روپے تک کی کمی پر طویل سیشن ہوا۔
ذرائع کا کہنا ہے کہ ٹیرف میں کمی کا فیصلہ اپریل سے نافذ کیا جائے گا، لیکن اس سے پہلے تقسیم کار کمپنیوں کی نجکاری کا نیا جامع منصوبہ آئی ایم ایف کو دینا ہوگا۔
آئی ایم ایف نے بجلی تقسیم کار کمپنیوں کی نجکاری کے موجودہ منصوبے پر عدم اطمینان کا اظہار کرتے ہوئے کمپنیوں کے نقصانات پر تشویش ظاہر کی ہے اور کمپنیوں کی کارکردگی کو بہتر بنانے کی ضرورت پر زور دیا ہے۔
حکومت نے 3 ڈسکوز کی نجکاری کا منصوبہ آئی ایم ایف کو پیش کیا ہے، جس میں پہلے مرحلے میں آئیسکو، فیسکو، اور گیپکو کی نجکاری ہوگی، جبکہ دوسرے مرحلے میں میپکو، لیسکو، اور حیسکو کی نجکاری کی جائے گی۔