آئی ایم ایف نے بجلی بلوں پر جی ایس ٹی ختم کرنے کی تجویز مسترد کر دی، موسم سرما کے ریلیف پیکج کی توسیع بھی مسترد
آئی ایم ایف نے بجلی صارفین کے لیے قیمتوں میں کمی کے لیے بجلی بلوں پر جنرل سیلز ٹیکس (جی ایس ٹی) ختم کرنے کی تجویز مسترد کر دی ہے۔ یہ مسترد شدہ تجویز پاکستان اور آئی ایم ایف کے درمیان جاری اقتصادی جائزہ مذاکرات کا حصہ ہے، جن میں توانائی کے شعبے میں گردشی قرضے کو کم کرنے کی بات کی جا رہی ہے۔
آئی ایم ایف نے صنعتی اور زرعی شعبے کے لیے موسم سرما کے ریلیف پیکج کو پورے مالی سال تک بڑھانے کی تجویز بھی مسترد کر دی ہے۔ بجلی کے صارفین کے لیے قیمتوں میں کمی کے لیے جی ایس ٹی کو ختم کرنے کی تجویز بھی مسترد کی گئی۔
آئی ایم ایف کو بتایا گیا کہ گردشی قرضے پر قابو پانے کے لیے کمرشل بینکوں سے 1250 ارب روپے قرض لیا جائے گا، جس پر 10.8 فیصد شرح سود ہو گی۔
ذرائع کے مطابق رئیل اسٹیٹ، پراپرٹی، بیورجز اور تمباکو کے شعبوں کے لیے ریلیف دینے کی تجویز ہے اور آئی ایم ایف کی منظوری سے تنخواہ دار طبقے پر ٹیکسوں کا بوجھ کم کرنے کی تجویز زیر غور ہے۔
ٹیکس وصولی کے لیے مختلف شعبوں سے 250 ارب روپے وصول کرنے کا منصوبہ ہے، جس میں تاجردوست اسکیم اور انتظامی اقدامات شامل ہیں۔ یہ تمام اقدامات آئی ایم ایف کی حتمی منظوری کے بعد کیے جائیں گے۔