اسلام آباد: عالمی مالیاتی ادارے (آئی ایم ایف) کا 9 رکنی وفد نیتھن پورٹر کی قیادت میں کل پاکستان پہنچے گا، جہاں وہ اقتصادی جائزہ لے گا اور آئندہ مالی سال 2025-26 کے بجٹ سے متعلق اپنی تجاویز پیش کرے گا۔
ذرائع کے مطابق، وفد تقریباً دو ہفتے تک پاکستان میں قیام کرے گا اور 15 مارچ تک وزارت خزانہ کے حکام کے ساتھ مذاکرات جاری رہیں گے۔ ان مذاکرات کے دو مراحل ہوں گے، پہلے مرحلے میں تکنیکی امور زیر بحث آئیں گے جبکہ دوسرے مرحلے میں پالیسی سطح پر تبادلہ خیال کیا جائے گا۔
آئی ایم ایف کے ساتھ کامیاب معاہدے کی صورت میں تنخواہ دار طبقے کو ممکنہ ریلیف ملنے کی امید ہے۔ مذاکرات میں وزارت خزانہ، وزارت توانائی، اسٹیٹ بینک، منصوبہ بندی ڈویژن اور دیگر اہم ادارے شامل ہوں گے۔
علاوہ ازیں، آئی ایم ایف وفد ایف بی آر، اوگرا، نیپرا سمیت دیگر مالیاتی اور انتظامی اداروں سے بھی مشاورت کرے گا، جبکہ چاروں صوبوں کے حکام کے ساتھ الگ الگ اجلاس ہوں گے۔