آئی سی سی چیمپئینز ٹرافی میں اپنا اہم ترین میچ کھیلنے کیلئے پاکستان کرکٹ ٹیم کراچی سے دبئی کیلئے پہنچ گئی۔
قومی ٹیم چیمپئینز ٹرافی کے ہائی وولٹیج ٹاکرے کیلئے کراچی سے دوپہر 1 بجے دبئی کیلئے روانہ ہوئی تھی تاہم نیوزی لینڈ کیخلاف انجری کا شکار ہونیوالے فخر زمان ٹیم کے ہمراہ نہیں جاسکے تھے۔
گزشتہ روز نیوزی لینڈ کیخلاف میچ کے دوران فیلڈنگ کرتے ہوئے فخر زمان پٹھوں میں موچ آجانے کے سبب انجری کا شکار ہوئے تھے جبکہ فخر کے متبادل کے طور پر امام الحق کو اسکواڈ کا حصہ بنالیا گیا ہے۔
فخر زمان کے ممکنہ متبادل کھلاڑیوں میں امام الحق کے علاوہ عبداللہ شفیق اور نوجوان محمد ہریرہ بھی شامل تھے، قبل ازیں ٹورنامنٹ کے آغاز سے قبل صائم ایوب ٹخنے کی انجری کے باعث ایونٹ سے باہر ہوگئے تھے۔
دوسری جانب بھارت کے خلاف میچ میں ناکامی پاکستان کو چیمپئینز ٹرافی کی سیمی فائنل کی دوڑ سے باہر کردے گی، قومی ٹیم کیلئے یہ میچ "کرو یا مرو" کی صورتحال اختیار کرچکا ہے۔
پاکستان ٹیم دبئی پہنچنے کے بعد آج آرام کرے گی جبکہ جمعہ کو پریکٹس سیشن میں حصہ لے گی۔