اسکول میں نقل کرکے امتیازی نمبروں سے پاس ہوگیا تھا، عمران ہاشمی کاانکشاف

ممبئی: نامور بالی ووڈ اداکار عمران ہاشمی نے انکشاف کیا ہے کہ وہ دوران تعلیم نقل کرکے 75 فیصد نمبروں سے پاس ہوگئے تھے لیکن آج انہیں اپنے اس فعل پر سخت شرمندگی ہے۔

بالی ووڈ اداکارعمران ہاشمی ان دنوں اپنی آنے والی فلم’چیٹ انڈیا‘کی تشہیر میں مصروف ہیں۔ اسی سلسلے میں ایک انٹرویو کے دوران جب ان سے پوچھا گیا کہ کیا کبھی انہوں نے اسکول یا کالج کے زمانے میں نقل کی ہے تو اس سوال کے جواب میں عمران ہاشمی نے صاف گوئی سے جواب دیتے ہوئے کہا کہ ہاں میں نے ایک بار نقل کی تھی اورامتیازی نمبروں سے پاس ہوگیاتھا۔

عمران ہاشمی نے واقعے کی تفصیل بتاتے ہوئے کہا کہ میں نے معاشیات(اکنامکس) کے پیپرز کی بالکل بھی تیاری نہیں کی تھی اورصرف میں نے نہیں امتحانی کمرے میں موجود دیگر طلبا کا بھی یہی حال تھا ممتحن(امتحانی کمرے میں موجود استاد) اس بات سے واقف تھے کہ کسی نے بھی امتحان کی تیاری نہیں کی ہے لہٰذا انہوں نےکہا میں اس کمرے میں 40 منٹ تک ہوں میرے بعد یہاں دوسرا ممتحن آجائے گا اسلیے جو بھی نقل کرنا چاہتا ہے اپنی کتاب کھول کر نقل کرسکتا ہے، اس دن میں نے نقل کی اور 75 فیصد نمبر لے کر پاس ہوا۔

تاہم عمران ہاشمی نے اپنے اس عمل پرفخر کرنے کے بجائے افسوس کا اظہار کرتےہوئے کہا کہ آج مجھے آپ کو یہ سب بتاتے ہوئے سخت شرمندگی ہورہی ہے، مجھے معلوم ہے نقل بالکل بھی اچھا عمل نہیں ہے اور میں یہی کہوں گا کہ کسی کو بھی نقل نہیں کرنی چاہئے۔

واضح رہے کہ عمران ہاشمی کی فلم ’چیٹ انڈیا‘ بھی تعلیمی نظام میں موجود نقل مافیا کے گرد گھومتی ہے جس نے تعلمی نظام کا بیڑہ غرق کرکے رکھ دیاہے۔ فلم اگلے ماہ 25 جنوری 2019 کو ریلیز کی جائے گی۔