پاکستان نے سری لنکا کے خلاف پہلے ٹیسٹ میچ کے پہلے روز کھیل کے اختتام پر 5 وکٹوں کے نقصان پر 281 رنز بنا لیے، خراب روشنی کے باعث پہلے دن کا کھیل مقررہ وقت سے قبل ختم کر دیا گیا۔
راولپنڈی کرکٹ اسٹیڈیم میں کھیلے جا رہے ٹیسٹ میچ میں سری لنکا نے ٹاس جیت کر پہلے فیلڈنگ کا فیصلہ کیا۔
پاکستان کی جانب سے ٹیسٹ ڈیبیو کرنے والے طیب عارف نے شاندار بیٹنگ کا مظاہرہ کرتے ہوئے نصف سنچری اسکور کی اور 57 رنز بنا کر آؤٹ ہوئے۔ کپتان بابر اعظم نے بھی عمدہ کھیل پیش کیا اور 54 گیندوں پر اپنے ٹیسٹ کیریئر کی 35ویں نصف سنچری مکمل کرنے کے بعد 50 رنز پر پویلین لوٹ گئے۔
ڈیبیو کرنے والے محمد طہٰ نے بھی نصف سنچری اسکور کرتے ہوئے 51 رنز بنائے، جبکہ سلمان آغا 16 رنز بنا کر آؤٹ ہوئے۔
دوسری جانب سعود شکیل نے ذمہ دارانہ بیٹنگ کا مظاہرہ کرتے ہوئے نصف سنچری مکمل کی اور 57 رنز کے ساتھ ناٹ آؤٹ رہے۔ ان کے ساتھ غازی غور 7 رنز بنا کر کریز پر موجود ہیں۔
پہلے روز خراب روشنی کے باعث کھیل وقت سے پہلے ختم کر دیا گیا۔ اس وقت تک مجموعی طور پر 67.2 اوورز کا کھیل ہوا تھا اور پاکستان نے 5 وکٹوں کے نقصان پر 281 رنز بنائے تھے۔
سری لنکا کی جانب سے اسیتھا فرنینڈو نے 2 وکٹیں حاصل کیں، جبکہ دلشن مدوشنکا، ملان رتنائیکے اور سونل ڈینوشا نے ایک، ایک کھلاڑی کو آؤٹ کیا۔
واضح رہے کہ پاکستان کی جانب سے اس ٹیسٹ میچ میں 4 کھلاڑیوں نے ڈیبیو کیا ہے۔