بھارتی اداکارہ انوشکا شرما کی جانب سے اپنے شوہر اور نامور کرکٹر ویرات کوہلی کے لیے ممبئی کے ایک چھوٹے سے ریسٹورنٹ سے "چھولے بھٹورے" منگوانے کے ایک آرڈر اور اس کی تعریف نے اس ریسٹورنٹ کو بند ہونے سے بچا کر راتوں رات شہرت کی بلندیوں پر پہنچا دیا ہے۔ "دہلی سے" نامی یہ چھوٹا سا ریسٹورنٹ سن 2022 میں تقریباً اٹھارہ لاکھ بھارتی روپے کے بھاری قرض میں ڈوبا ہوا تھا اور اس کے مالکان مالی تنگی کے باعث اسے بند کرنے پر سنجیدگی سے غور کر رہے تھے۔
اسی کڑے وقت میں مشہور کامیڈین ابھیشیک اپمنیو نے اپنے انسٹاگرام پر اس ریسٹورنٹ کے چھولے بھٹورے کی پرزور تعریف کی، جسے دیکھ کر انوشکا شرما نے ویرات کوہلی کے لیے وہاں سے کھانا آرڈر کیا اور سوشل میڈیا پر اس کے ذائقے کی تعریف کی۔ اس بااثر سلیبریٹی اینڈورسمنٹ کے بعد ریسٹورنٹ کو زبردست پذیرائی ملی، گاہکوں کا تانتا بندھ گیا اور دیکھتے ہی دیکھتے کاروبار کے دن پھر گئے۔