نیویارک (ٹیکنالوجی ڈیسک): سماجی رابطوں کی معروف کمپنی میٹا نے انسٹاگرام اور فیس بک استعمال کرنے والے 18 سال سے کم عمر نوعمر صارفین کے لیے جامع حفاظتی اقدامات اور پابندیاں نافذ کرنے کا اعلان کیا ہے۔ یہ اقدامات امریکی ریاستوں کے ساتھ سوشل میڈیا کے حد سے زیادہ استعمال اور لت سے نمٹنے کے لیے طے پانے والے معاہدے کے تحت کیے جا رہے ہیں۔
نئے قواعد کے تحت نوعمر افراد کے لیے روزانہ اسکرین ٹائم ابتدائی طور پر دو گھنٹے تک محدود کیا جائے گا، جبکہ رات 12 سے صبح 6 بجے تک ایپس تک رسائی خودکار طور پر بند رہے گی۔ اسکول کے اوقات (صبح 8 تا سہ پہر 3 بجے) کے دوران نوٹیفکیشنز خاموش رہیں گے اور مسلسل استعمال پر وقفے کی یاد دہانی کرائی جائے گی۔ صارفین کو خودکار ویڈیو پلے بند کرنے، ذاتی نوعیت کی الگورتھمک فیڈ کو غیر فعال کرنے اور لائکس کی تعداد چھپانے کے اختیارات بھی ملیں گے، جبکہ کاسمیٹک سرجری جیسے انتہائی فلٹرز پر پابندی عائد ہوگی۔
نئے نظام کے تحت اجنبی بالغ افراد کے نوعمر صارفین سے رابطوں کو سختی سے روکا جائے گا اور 13 سال سے کم عمر بچوں کے اکاؤنٹس ہٹانے کے لیے عمر کی تصدیق کے نظام کو مزید جدید بنایا جائے گا۔ نقصان دہ مواد کی 90 فیصد شکایات پر 6 گھنٹے میں کارروائی کا ہدف رکھا گیا ہے، جبکہ والدین کو بچوں کی سرگرمیوں پر مکمل نگرانی کے اختیارات حاصل رہیں گے۔