موجودہ حالات کے باعث عیدالفطر نہیں منا سکتی: اداکارہ ریشم

معروف اداکارہ ریشم نے رواں سال عیدالفطر نہ منانے کی وجہ موجودہ عالمی حالات کو قرار دیتے ہوئے کہا ہے کہ دنیا بھر میں جاری جنگوں اور بحرانوں نے خوشیوں کا رنگ پھیکا کر دیا ہے۔

ایک پروگرام میں گفتگو کرتے ہوئے اداکارہ نے کہا کہ ایسے حالات میں جب دنیا کے مختلف حصوں میں انسانی جانوں کا ضیاع ہو رہا ہو اور لوگ مشکلات کا شکار ہوں، وہ عید کی خوشیاں روایتی انداز میں نہیں منا سکتیں۔ انہوں نے کہا کہ موجودہ صورتحال نے کئی افراد کو عید منانے سے بھی محروم کر دیا ہے۔

ریشم کے اس بیان پر سوشل میڈیا پر ملا جلا ردعمل دیکھنے میں آیا، جہاں کچھ صارفین نے ان کے جذبات کی تائید کی، جبکہ بعض نے ان کے مؤقف سے اختلاف بھی کیا۔

یاد رہے کہ ریشم پاکستان کی معروف اداکارہ ہیں جنہوں نے اپنے کیریئر کا آغاز پی ٹی وی سے کیا اور بعد ازاں فلم انڈسٹری میں بھی نمایاں مقام حاصل کیا۔ ان کا فیشن سینس اور پیشہ ورانہ انداز مداحوں میں خاصا مقبول رہا ہے۔