بالی ووڈ کے معروف اداکار سنجے دت اور ڈانسر و اداکارہ نورا فتیحی کا نیا گانا ریلیز ہوتے ہی تنازع کا شکار ہو گیا۔
بھارتی میڈیا رپورٹس کے مطابق فلم ’’ڈی: دی ڈیول‘‘ کا گانا ’’سرکے چُنر تیری سرکے‘‘ یوٹیوب پر جاری کیا گیا، جس کے بعد اسے شدید تنقید کا سامنا کرنا پڑ رہا ہے۔
رپورٹس میں بتایا گیا ہے کہ گانے کے خلاف باقاعدہ شکایت درج کرا دی گئی ہے۔ ایڈووکیٹ ونیت جندال نے فلم سرٹیفکیشن کے مرکزی بورڈ سے رجوع کرتے ہوئے مطالبہ کیا ہے کہ گانے کے خلاف فوری قانونی کارروائی کی جائے۔
ذرائع کے مطابق شکایت کو وزارت اطلاعات و نشریات کو بھی ارسال کر دیا گیا ہے، جس میں مؤقف اختیار کیا گیا ہے کہ گانے کے بعض بول قابلِ اعتراض ہیں اور اس کی فلم بندی میں غیر اخلاقی مناظر شامل کیے گئے ہیں۔
درخواست گزار کا کہنا ہے کہ اس نوعیت کا مواد کم عمر بچوں اور نوجوانوں پر منفی اثر ڈال سکتا ہے، اس لیے گانے پر فوری پابندی عائد کی جائے۔
دوسری جانب اس معاملے پر سوشل میڈیا پر بھی بحث جاری ہے، جہاں صارفین کی جانب سے ملے جلے ردعمل کا اظہار کیا جا رہا ہے۔