پاکستان کے معروف فلم اور ٹی وی اداکار شجاعت ہاشمی کا لاہور میں انتقال ہو گیا۔ اہلخانہ کے مطابق وہ کچھ عرصے سے علالت کے باعث زیر علاج تھے۔ مرحوم کی نماز جنازہ آج رات 9 بجے جامعہ نعیمیہ میں ادا کی جائے گی۔
شجاعت ہاشمی نے کئی دہائیوں تک اپنی شاندار اداکاری سے ناظرین کے دل جیتے اور پاکستان ٹیلی ویژن کے سنہری دور کے نمایاں اداکاروں میں شمار ہوتے تھے۔ ڈرامہ سیریل وارث میں مولاداد کے کردار نے انہیں گھر گھر مقبول بنا دیا تھا۔
اداکار نے 1970 کی دہائی میں اپنے فنی کیریئر کا آغاز ڈرامہ کہر سے کیا جبکہ ان کی پہلی پنجابی فلم چھڈ برے دی یاری 1975 میں ریلیز ہوئی۔ 1979 کی فلم خاک اور خون میں انہوں نے مرکزی کردار ادا کیا اور بعد میں فلموں وڈا خان اور دو ضدی میں اپنی اداکاری کو خوب سراہا گیا۔
شجاعت ہاشمی نے فلم اور ٹی وی دونوں شعبوں میں یادگار کردار ادا کیے اور اپنی صلاحیتوں کا لوہا منوایا۔ اداکاری کے شعبے میں ان کی خدمات کے اعتراف میں انہیں 1994 میں پرائیڈ آف پرفارمنس سے نوازا گیا۔
پاکستانی شوبز انڈسٹری ایک ایسے فنکار سے محروم ہو گئی جس کی یادگار اداکاری ہمیشہ ناظرین کے دلوں میں زندہ رہے گی۔