بالی ووڈ کے معروف فلم ساز اور اداکار انوراگ کشیپ نے متنازعہ فلم ’’دی کیرالہ اسٹوری 2‘‘ پر کھل کر تنقید کی ہے اور اسے محض پروپیگنڈا قرار دیا ہے۔ کشیپ کا کہنا ہے کہ فلم کے بنانے والوں نے سنجیدہ موضوع اور مضبوط کہانی کی بجائے صرف منافع کو ترجیح دی ہے۔
فلم کی پہلی قسط کے تقریباً تین سال بعد ریلیز ہونے والی اس دوسری قسط نے ایک بار پھر بحث و تنازع کو جنم دیا ہے۔ پروڈیوسر ویپول امرت لال شاہ اور ہدایتکار کماکھیا نارائن سنگھ کے تحت بننے والی اس فلم میں انوراگ کشیپ نے متنازع مناظر کا حوالہ دیتے ہوئے کہا کہ یہ مناظر حقیقت سے دور اور غیر ضروری طور پر اشتعال انگیز ہیں۔ ان کے بقول فلم کا مقصد صرف توجہ حاصل کرنا اور کاروباری فائدہ اٹھانا ہے۔
دوسری جانب قانونی محاذ بھی کھل گیا ہے، جب ماہر حیاتیات سری دیو نمبودری نے کیرالہ ہائی کورٹ میں درخواست دائر کرتے ہوئے فلم کی ریلیز روکنے کی استدعا کی۔ درخواست میں مؤقف اختیار کیا گیا کہ فلم کے بعض مندرجات سماجی ہم آہنگی کو متاثر کر سکتے ہیں۔
فلم کی ریلیز سے پہلے ہی یہ تنازعہ فنکارانہ آزادی، سماجی ذمہ داری اور حساس موضوعات کے استعمال پر ایک نئی بحث کو جنم دے رہا ہے، جس نے بالی ووڈ میں دلچسپی رکھنے والے ناظرین اور میڈیا کی توجہ حاصل کر لی ہے۔