گوگل کروم صارفین کا ڈیٹا خطرے میں پڑگیا؟

اگر آپ بھی ان 3.5 ارب صارفین میں شامل ہیں جو ونڈوز، میک، لینکس یا اینڈرائیڈ پر گوگل کروم استعمال کرتے ہیں، تو محتاط ہو جائیں۔ گوگل نے ایک ہفتے میں دوسری بار ہنگامی سیکیورٹی اپ ڈیٹ جاری کی ہے تاکہ ایک خطرناک خامی کو دور کیا جا سکے جو صارفین کے سسٹمز کو ریموٹ کوڈ ایکزیکیوشن حملوں کے خطرے میں ڈال سکتی ہے۔

یہ اپ ڈیٹ CVE-2025-12036 نامی بگ کو نشانہ بناتی ہے، جو کروم کے V8 جاوا اسکرپٹ انجن میں پایا گیا ہے۔ اس خامی کے ذریعے ہیکرز کسی متاثرہ ویب سائٹ پر وزٹ کرانے سے ہی نقصان دہ کوڈ چلانے کے قابل ہو جاتے ہیں، اور صارف کو کوئی اضافی عمل کرنے کی ضرورت نہیں ہوتی۔

گوگل ٹیم کے رکن سرینواس سِستا کے مطابق یہ مسئلہ گوگل کے AI سیکیورٹی ٹول “Big Sleep” نے دریافت کیا۔ خامی کی مزید تفصیلات فی الحال ظاہر نہیں کی گئیں تاکہ زیادہ سے زیادہ صارفین اپ ڈیٹ انسٹال کر سکیں۔

اپنے کروم براؤزر کو محفوظ رکھنے کا طریقہ:

• ونڈوز اور میک صارفین: کروم کو ورژن 141.0.7390.122 یا .123 تک اپ ڈیٹ کریں۔

• لینکس اور اینڈرائیڈ صارفین: ورژن 141.0.7390.122 دستیاب ہے۔

عمومی طور پر کروم خودکار طور پر اپ ڈیٹ ہو جاتا ہے، لیکن دستی طور پر بھی Settings → About Google Chrome پر جا کر اپ ڈیٹ چیک کی جا سکتی ہے۔ اپ ڈیٹ کے بعد کروم کو دوبارہ کھولنا (ری لانچ) ضروری ہے، ورنہ نیا سیکیورٹی پیچ فعال نہیں ہوگا۔

چونکہ اس خامی کا فائدہ اٹھانے والے حملے پہلے ہی شروع ہو چکے ہیں، اس لیے بہتر ہے کہ آپ جلد از جلد اپنا براؤزر اپ ڈیٹ کر لیں تاکہ آپ کا ڈیٹا اور ڈیوائس محفوظ رہیں۔