.jpg)
لزبن: پرتگال کے عالمی شہرت یافتہ فٹبالر کرسٹیانو رونالڈو اگرچہ اپنے شاندار کیریئر میں ابھی تک فیفا ورلڈ کپ کا ٹائٹل حاصل نہیں کر سکے، لیکن ان کی مالی کامیابیاں انہیں دنیا کے امیر ترین کھلاڑیوں میں شامل کرتی ہیں۔
فوربز کی حالیہ رپورٹ کے مطابق کرسٹیانو رونالڈو کے مجموعی اثاثوں کی مالیت تقریباً 1.2 ارب ڈالر تک پہنچ چکی ہے، جس کے بعد وہ تاریخ کے چند ایسے کھلاڑیوں میں شامل ہو گئے ہیں جنہوں نے ارب پتی حیثیت حاصل کی۔
رپورٹ کے مطابق رونالڈو نے گزشتہ ایک سال کے دوران تقریباً 300 ملین ڈالر کمائے، جس کا حساب لگایا جائے تو ان کی آمدنی میں ہر منٹ تقریباً 570 امریکی ڈالر کا اضافہ ہوا۔ پاکستانی کرنسی میں یہ رقم ایک لاکھ 58 ہزار روپے سے زائد فی منٹ بنتی ہے۔
رونالڈو کی آمدنی میں سب سے بڑا اضافہ 2023 میں سعودی عرب کے فٹبال کلب النصر کے ساتھ معاہدے کے بعد ہوا۔ اس معاہدے کی 2025 میں تجدید بھی کی گئی، جس کے تحت پرتگالی اسٹار سالانہ 200 ملین ڈالر سے زائد کماتے ہیں۔
تاہم رونالڈو کی دولت کا ذریعہ صرف فٹبال نہیں ہے۔ اسپانسرشپ معاہدے، مختلف کاروباری منصوبوں میں سرمایہ کاری، برانڈ ویلیو اور سوشل میڈیا سے حاصل ہونے والی آمدنی بھی ان کی مالی کامیابی میں اہم کردار ادا کرتی ہے۔
فٹبال کے میدان میں رونالڈو نے کئی تاریخی ریکارڈ اپنے نام کیے ہیں۔ اگرچہ پرتگال حالیہ فیفا ورلڈ کپ میں ٹائٹل جیتنے میں کامیاب نہ ہو سکا اور یہ ممکنہ طور پر رونالڈو کی آخری ورلڈ کپ شرکت تصور کی جا رہی ہے، تاہم انہوں نے اب تک بین الاقوامی فٹبال سے باضابطہ ریٹائرمنٹ کا اعلان نہیں کیا۔
کرسٹیانو رونالڈو نہ صرف فٹبال کی دنیا کے بڑے ستاروں میں شمار ہوتے ہیں بلکہ وہ کھیلوں کی تاریخ کے کامیاب ترین اور سب سے زیادہ کمانے والے ایتھلیٹس میں بھی شامل ہیں۔