.jpg)
لاہور: پاکستان سپر لیگ (پی ایس ایل) کے گیارہویں ایڈیشن کے آغاز میں صرف ایک دن باقی رہ گیا ہے، اور ایونٹ سے قبل تمام ٹیموں کے کپتانوں نے لاہور کے قذافی اسٹیڈیم میں مشترکہ پریس کانفرنس میں شرکت کی۔
پریس کانفرنس کے دوران مختلف ٹیموں کے کپتانوں نے ٹورنامنٹ کے حوالے سے اپنے خیالات کا اظہار کرتے ہوئے بہترین کارکردگی دکھانے کے عزم کا اظہار کیا۔
حیدرآباد کنگزمین کے کپتان مارنس لبوشین کا کہنا تھا کہ ان کی کوشش ہوگی کہ ٹیم کے تمام کھلاڑی جلد ایک دوسرے کے ساتھ ہم آہنگ ہو جائیں اور ایک مضبوط یونٹ کے طور پر میدان میں اتریں۔
راولپنڈی ٹیم کے کپتان محمد رضوان نے کہا کہ پی ایس ایل ایک معیاری ٹورنامنٹ ہے اور تمام ٹیمیں شائقین کو بہترین کرکٹ دکھانے کی کوشش کریں گی۔
ملتان سلطانز کے کپتان ایشٹن ٹرنر نے پاکستان آمد پر خوشی کا اظہار کرتے ہوئے کہا کہ ان کی ٹیم متوازن ہے اور تمام کھلاڑی بہترین کارکردگی دکھانے کی صلاحیت رکھتے ہیں۔
واضح رہے کہ پی ایس ایل 2026 کا افتتاحی میچ کل لاہور کے قذافی اسٹیڈیم میں کھیلا جائے گا، جہاں دفاعی چیمپئن لاہور قلندرز کا مقابلہ حیدرآباد کنگزمین سے ہوگا۔