پاکستان کرکٹ ٹیم نے 3 میچز کی سیریز کے دوسرے ون ڈے میں بنگلادیش کو 128 رنز سے شکست دے دی، جس کے بعد سیریز 1-1 سے برابر ہو گئی۔
پاکستان نے پہلے بیٹنگ کرتے ہوئے 48 اوورز میں 274 رنز بنائے۔ نوجوان بلے باز معاذ صداقت نے 46 گیندوں پر 75 رنز اسکور کیے جن میں 6 چوکے اور 5 چھکے شامل تھے۔ سلمان علی آغا نے 64 رنز بنائے جبکہ محمد رضوان 44، اوپنر صاحبزادہ فرحان 31 اور فہیم اشرف 14 رنز بنا کر آؤٹ ہوئے۔ بنگلادیش کی جانب سے رشاد حسین نے 3 اور مہدی حسن میراز نے 2 وکٹیں حاصل کیں۔
بارش کے باعث میچ متاثر ہوا اور بنگلادیش کو 32 اوورز میں 243 رنز کا ہدف ملا۔ ہدف کے تعاقب میں بنگلادیش کی ٹیم 24 ویں اوور میں صرف 114 رنز بنا کر آؤٹ ہو گئی۔ لٹن ڈاس 41 رنز کے ساتھ نمایاں رہے جبکہ توحید نے 28 اور سیف حسن نے 12 رنز اسکور کیے۔ پاکستان کی جانب سے معاذ صداقت اور حارث رؤف نے 3،3 جبکہ شاہین آفریدی نے 2 وکٹیں حاصل کیں۔
شاہین شاہ آفریدی کی قیادت میں کھیلے گئے اس میچ میں پاکستان کی شاندار کارکردگی نے ٹیم کو فتح دلائی اور سیریز کو برابر کر دیا۔