پاکستان ریلویز کی تمام ٹرینوں میں کیمرے نصب کیے جائیں گے، حنیف عباسی

وزیر ریلوے حنیف عباسی نے اعلان کیا ہے کہ پاکستان ریلویز کی تمام ٹرینوں میں سکیورٹی کیمروں کی تنصیب کی جائے گی۔ انہوں نے بتایا کہ راولپنڈی اسٹیشن کو ملک کا پہلا اسمارٹ اسٹیشن بنایا جا چکا ہے، جس میں کیمرے اور جدید سکیورٹی نظام نصب ہیں، اور 2026 میں دیگر بڑے اسٹیشنز بھی اسمارٹ بنائے جائیں گے۔

وزیر ریلوے نے پاکستان ریلویز کی 2025 کی کارکردگی کا ذکر کرتے ہوئے کہا کہ ادارے نے 93 ارب روپے سے زائد ریونیو حاصل کیا، اور مالی سال 2025-26 کی پہلی ششماہی میں 50 ارب روپے کی آمدن متوقع ہے۔ وہ توقع کرتے ہیں کہ سال کے اختتام تک پاکستان ریلویز پہلی بار ایک کھرب روپے کی آمدن عبور کر لے گا۔

انہوں نے بتایا کہ سیفٹی ڈپارٹمنٹ کو ڈائریکٹوریٹ میں تبدیل کر دیا گیا ہے، جس کے بعد حادثات کی شرح 0.09 فیصد سے کم ہو کر 0.04 فیصد پر آ گئی ہے، اور اب ریلوے کو کوئی سنگین حادثہ پیش نہیں آیا۔

حنیف عباسی نے مزید کہا کہ پاکستان ریلویز نے صرف 8 ماہ میں 8 ریکس کی ٹرینوں کو اپ گریڈ کیا، جن میں شالیمار، پاک بزنس، لاثانی اور فیض احمد فیض ٹرینیں شامل ہیں، اور دسمبر 2026 تک تمام ٹرینیں اپ گریڈ کر دی جائیں گی۔

وزیر ریلوے نے بتایا کہ لاہور، کراچی، راولپنڈی، فیصل آباد سمیت دیگر بڑے اسٹیشنوں کی اپ گریڈیشن مکمل کر دی گئی ہے، وزارت کے تمام کام ای فائلنگ پر منتقل کر دیے گئے ہیں، اور اسٹیشنوں پر اے ٹی ایم، ڈی وی ایم اور پی او ایس مشینیں موجود ہیں۔

عملے کی حاضری بھی کمپیوٹرائزڈ کر دی گئی ہے، اور بغیر دفتر آئے کوئی تنخواہ نہیں لے سکتا۔ 2025 میں قابضین سے 394 ایکڑ اراضی واگزار کروائی گئی، جبکہ دسمبر 2026 تک تمام قابضین سے اراضی واگزار کروائی جائے گی۔

انہوں نے مزید بتایا کہ اسٹیشنوں کی صفائی اور کھانے کے معیار کو بہتر بنایا گیا ہے اور کراچی تا روہڑی ٹریک بنانے کے منصوبے پر جولائی میں گراؤنڈ بریکنگ متوقع ہے۔